LÜTT BETEN PLATT MIT'T ABENDBLATT

Wat'n Wedder!

Von GÜNTER HARTE

Dat kann'n jo so un so verstohn: Wat'n Wedder wedder! Dat dat besonners scheun is, oder dat wi Schietwedder hebbt.
   Düt Johr hebbt wi doch bet nu Glück hatt, dücht mi; to'n Bispill Oostern un Pingsten en Wedder to'n Achterrutslogen! Twüschendorch ok mol Regen, wenn't neudig weer.
   Man so richtig ut't Stüür is dat Wetter nich west, hett nich sien Nücken hatt, is nich - as'n freuher ok seggt hett - "narrsch un kathoolsch" west.
   Wenn dat so richtig ruuch weer un ümmerlos plittern un plattern dä, denn hett de, de en goden Hund harr, em nich vor de Döör joogt. Man wat ward denn mit de "Geschäften"? Dat gung vor lange, lange Tiet ober ok de Mannslüüd an, de ehr "Klo" noch oftins in dat wiede Ümrüm von'n Hoff harrn. So heet en oll Woort: Wat'n Wedder, sä de Buur, do sch . . . he in'n Kohstall!
   Man wenn dat Wedder sik so fein besinnt as düt Johr, wenn de Sünn uns al warme Freuhjohrsdoog gönnt, denn is de Regen to rechte Tiet bannig goot for de Natur, dennn kannst dat Gras wassen heuren. Un wenn du sülm noch wat plant't hest, denn sühst du dien Petersillen, dien Bohnen un Wotteln wassen, dien Tomoten un Gurken un natürlich de Blomen (!) bleuhen . . . Jo, jo, de Regen is denn nich mit Geld to betohlen.
   Man nochmol, wenn't to dull is: Wenn uns Fründ Willem in Niendörp "Wat'n Wedder!", seggen dä, meen sien Nober: "Stieg mol rop un mook de Luken to!" Un seten se in'n Kroog, denn nickkopp de Weert: "Petrus is verreist!"
   En olles Regenleed, dat wiet in Noorddüütschland bekannt weer, gung so:

Regen, Regen, rusch,

de König fohrt to Busch,

loot den Regen öbergohn,

loot de Sünn wedderkom'n,

lebe Sünn, kumm wedder

mit dien gollen Fedder,

mit dien gollen Strohlen,

beschien uns alltomolen!

Se hett uns düt Johr al "alltomolen" beschenen, de lebe Sünn, hier boben öfters as ünnen in'n Süden! Scheun Wedder gifft dat, wenn de Sünn hell un kloor ünnergeiht. Goht wi mit ehr to Puuch, köönt wi uns op'n scheunen neen Dag freien. Un een Woort is sinnbildlich meent: Öberall geiht de Sünn morgens op!

zurück

zurück zur hp