LÜTT BETEN PLATT MIT'T ABENDBLATT

Mit di doch nich!

Von GÜNTER HARTE

Nee, is kloor, di kann kener an'n Wogen fohren, du lettst di nich an'n Lack kratzen, di kann keeneen an de Farv! Di kann dat nich passeern, dat du fardig büst mit Jack un Büx oder di dat mol so richtig an't Mogere geiht!
   Nee, so'n Booskeerl, as du büst, so'n starken un plietschen Gast, den ritt un smitt nix üm. Alleen wenn du dor so stebig steihst, wenn du dor so kickst "Wat weet ji al?!", wenn du von allens so "öberlegen" snackst, nee, di köönt se nix.
   Du snackst jo mehrstiets hoochdüütsch, ok in uns Runn, un is "souverän" nich dien Woort? Nee, di kann keeneen . . .
   Ik snack mi mit'n Fründ doch geern mol wat von de Seel, un ok uns Nober Peter hett denn un wenn wat lostowarrn öber düsse putzwunnerliche Welt. Man du steihst jo sotoseggen öber allens, un du kannst so spöttsch un spietsch kieken, Jungejo!
   Di kann würklich nix . . .
   Natürlich kummt ok dien Knööv un Kroosch von dien Könen, kloor. Ik kenn dat jo von't Tennisduppel un von't Schachspelen oder wat du so von dien "bobere Etoosch" in de Firmo vertellst.
   Na, un bi de Froons kummst du ok goot an, hest du mol seggt, meen ik. Wat sall di al groot . . .
   Man ik meen: Wenn di mol wat mallöört - een weet doch nich -, wenn du mol op'e Snuut liggst, wenn di dat doch mol dreckig geiht (Tschulligung!), denn klopp geern bi mi an oder ok bi Nober Peter, du kennst em jo.
   Schick di eerstmol in dien Schicksool, wo du sülm meisttiets keen Schuld an hest, un klopp bi uns an un snack di ut. Nimm di dor Tiet for. Un schaneerlich is dat nich . . .
   Ok de Gröttst glippt mol ut, kriggt wat twüschen de Höörn, hett mol Schiet an de Finger; loot dat getuutje angohn denn, keen Bang, so'n strammen un düchtigen Keerl as du, de kummt wedder op de Been . . .
   Un villicht lehrt'n in so'n Loog ok eenfach mol wat von't geweuhnliche Leben dorto, Fründ. Nix for ungoot!

zurück

zurück zur hp