LÜTT BETEN PLATT MIT'T ABENDBLATT

Bargen, Woter un Wohld . . .

Von GÜNTER HARTE

Amrum is en scheune Insel: Dünen, Woter, Watt, de brede Kniepsand! Dor kunnst du öberall molen un knipsen, ok in dat snuckelige Dörp Nebel . . .
   Ik bün dor freuher tweemol mit en Schoolklass west; vor veer Johr ok mit mien Froo. Wi hebbt dat genoten; harrn ok dat Glück, en Sünnenünnergang bi'n wulkenlosen Heben to beleben: düsse Klören! - Wi weern goot ünnerbrocht, nette Lüüd, ornlich Freuhstück, feine Stuuv; ober weetst du, wat dor for'n Bild hung? "Schweizer Bergwelt"! Also nee! Wat sä uns Lehrer ümmer bi sowat? "Genau das konträre Gegentum!"
   Jo, wi hebbt uns düchtig wunnert. Loterhen ober smuustert un uns freit, dat'n in Nebel Teeknungen un Radierungen von de Insel un dat Ümrüm keupen kunn . . .
   Denn sünd wi vor twee Johr in't Weserbergland west, dicht bi Hameln, weern dor in'n Pension ok goot ünnerbrocht. Un wat harrn wi nu for'n Bild an de Wand hangen? Dat kannst doch nich roden: "Brandung an der Jammerbucht"!
   Hoge, gires-greune Bülgen mit witte Gischtkronen op, Strom öber't Woter, duuster Wulken . . . So weer dat in de Nehgd von Hameln, nix von den Rottenfänger oder von Münchhausen . . .
   Ik heff dat mit de Biller mienen Sportfründ Peter vertellt: un nu weet ik nich, wat he mi enen opbinnen wull; jedenfalls vertell he, in sien Hotelstuuv op'e Zugspitz harr he en Bild hatt "Waldstück mit scheuen Rehen"!
   Man nu hebbt wi jüst in uns Ferien en Slitzohr von Weert hatt an'n Neckar in Heilbronn: In uns Duppelzimmer hung in'n Wesselrohmen en Bild +Speicherstadt Hamburg`.
   Ik bün jo nich neeschierig; man ik keek mol achter den Rohmen, un dor geev dat noch düsse Biller: "Lübecker Holstentor", "Der Bremer Roland", "Laboe an der Kieler Förde" un "Kap Arkona".
   As wi den Weert bi't Obendbroot so achterrüm frogen dän, wat he denn so for Gäste harr, do sä he: "Ach, viele Nordlichter! So von den Hansestädten, und schon länger eine Gruppe von Stralsund und Rügen."
   Weetst, wat mi dunn infull: "Nachtigall, ick hör dir trapsen!"

zurück

zurück zur hp