LÜTT BETEN PLATT MIT'T ABENDBLATT

Heff ik dat utmookt?

Von GÜNTER HARTE

Irmi is so 'ne nette un düchtige Froo, dor hett Fiete richtig mit in 'n Glückspott langt. Bloots een Sook, du, dor hett se beus mit to doon: Wenn se eben ut't Huus is, ward se kribbelig: Heff ik allens utmookt un afstellt? Dat Licht in de Sloopstuuv, de Koffimaschin, den Elektroherd - dat Feernsehn? Un de Finster sünd doch to, de Döör is doch afsloten, oder?
   "Fiete, kannst du mol eben no den Herd kieken", seggt se denn, oder: "Fiete, hest du de Finster in de Wohnstuuv tomookt?" Oder ok: "Du, Fiete, ik heff di doch noch en Hemd bögelt; kannst du mol kieken, wat de Steker von't Striekiesen ruttrocken is?!" Un all so wat.
   Fiete kennt dat nu al öber twintig Johr, un so weet he natürlich, dat so 'n Snack as "Ik gleuv, jo!" dat Leegste is, wat he seggen kann. Un ok: "Du hest den Steker ruttrocken/ - In de Wohnstuuv? De sünd to/ - De Herd is gor nich an west . . ." Nee, dat reckt nich ut. Denn ward Irmi nerveus oder vor Bammel gor en beten beus, un wiss kummt denn: "Goh doch noch mol eben rop un kiek no!"
   Fiete un Irmi striet sik nie öber Geld, nich öber den nehgsten Ferienort, nich öber Tüüg oder Meubel, nich öber Eten un Drinken; oder öber "Sekerheit", wenn se eben ut't Huus sünd, dor geiht dat mennigmol hooch üm her! Dat heet, egentlich müss 'n seggen: "gung"! Denn Fiete hett mit de Tiet nogeben; ännern kunn un kann he bi sien lebe un düchtige Irmi doch nix, un so geiht he eben noch mol hooch un kickt no . . .
   Dat Neeste, wat Irmi siet düssen Sommer to ehren netten Mann mol seggt, wenn se ünnen oder bi't Auto sünd, is: "Wat de Hauptsicherung woll an is? Kiek doch mol no, Fiete!"
   "Wat du nu mit de Hauptsicherung hest, Schieter, dor goh ik nie ran!"
   "Ober de kann doch rutspringen, Fiete."
   Düss' Geschicht kummt dorher: De Nobers Hellkamp sünd in den Heumoond Juli in Frankriek west, un an 'n veerten Dag hett he anropen: He harr die Hauptsicherung afstellt, un nu weer em dat dorch den Kopp gohn, wat dat for dat Keuhlschapp woll goot weer?? Se muchen doch mol nokieken, en Slötel harrn se jo. Fiete gung röber: Oh, oh, wat dat dor stünk! Oh, oh, wo gau se dat Fleesch un Krooms ut dat "Tiefkühlfach" wegsmeten hebbt! Un wat Hellkamps noher öber ehr Döösbaddelee schüttkoppt hebbt!
   Un se mutt Fiete denn un wenn no de "Hauptsicherung" kieken . . .

zurück

zurück zur hp