LÜTT BETEN PLATT MIT'T ABENDBLATT

Sien Sporen ward Knickern

Von GÜNTER HARTE

Hinnerk Brodersen hett von sienen Vadder en Snack öbernohmen, den de so eernst gor nich nohmen hett: Spoorwat hett wat, Frittop hett nix! - Vadder much so'n olle Seggwiesen geern, liggt dor jo ok Lebenssicht un oftins Humor binnen. Un von't Sporen harr he dat olle "Spoor in de Tiet, denn hest du in de Noot!" Ümdreiht to "Spoor in de Noot, denn hest du Tiet dorto!"
   Dat von spoorsoom bet giezig oftins gor keen so langen Weg is, dor keem de Vadder smuusterig so mit rut: "Ik smeuk koolt, sä Peter Danner, dat spoort Tobak."
   Na, Hinnerk hett den Pedd mookt von spoorsoom to giezig; dat weet sien Verwandten, sien Kollegen und sien Sportfrünnen. He kummt nich mit'n Ellbogen in de Tasch, as'n so seggt, wat dat nu in de Kantin' is oder in't Sporthuus an de Theek, wo jo egentlich jeder mol en Runn utgeben mutt. He kann sik wohren! Un wenn en anner Mannschop bi'n Turnier inloodt is, do hett he al seggt: "Woso süllt wi de twee Halbe spendeern, reckt dor nich een Alsterwoter?" Do hett Mannschopsfeuhrer Peter grient: "Ut dien Sporen is al lang Knickern worrn; pass op, dat se di nich Knickstebel oder Kniesbüdel neumt, Hinnerk!"
   Peter droff sowat seggen; man he kreeg natürlich liekers de "richtige" Antwoort: "Du smittst jo geern dien Geld to'n Finster rut; ober de wat spoort, de wat hett, mien Lebe!"
   "Jo, ik weet, Hinnerk; du hest jo würklich dorch dien Giezen wat op de hoge Kant. Ober bi mennigeen is dat ober ok so: He itt Botterkringel, dat he Botter spoort."
   "Na jo, smecken sall dat jo man", nickkopp Hinnerk smuusterig. Do stups Peter em an: "Segg mol, wo kriggt dien gode Lisa dat hen mit Eten koken? Bi dien Nörigkeit (Geiz)! Ik heff mol heurt: Wenn de Knicker ok noch lecker is (gern gut isst), denn hett de Kööksch veel Koppweh!"
   Do lach Hinnerk: "Lisa is keen Kniesgreten, du! De is nich knickerig, nich mol richtig spoorsoom."
   "Dor hest ober Sott hatt mit ehr, mien Jung!"
   "Jo, bi't Eten. Dor nehm ik dat geern riev (üppig) hen. Ober so mit Tüüg un Krooms un Reisen . . ." - "Kann ik mi denken; denn heet dat for di: Beter knickerig un knackerig as riev un rackerig, wat?!"

zurück

zurück zur hp