LÜTT BETEN PLATT MIT'T ABENDBLATT

En dullen Droom!

Von GÜNTER HARTE

Also sowat! Ik suus de Piste dol, "Schußfahrt", weetst woll, denn "Pflug", Swung no links, Swung no rechts, un brems elegant bi Froo un Söhn an de Gondelbohn.
   Also sowat!
   Ik kann nämlich gor nich Ski lopen. Un nu suus ik in'n Droom as so'n Meister op de Breder, feuhl mi ok grootoordig un bün glücklich! Un de Lüüd, de mi fohren seht (dor in'n Droom), de denkt: De kann ober fohren, de Oll! Dat denk ik so, in'n Droom . . . Dreumen is doch scheun, nich?!
   Ik weet, dat gifft ok Angstdreum. Man düt hier: Wunnerboor! Ober woll gor keen Wunner; dor ward villicht en Wunsch wohr. Ik finn dat nämlich ganz dull, wo de Jungs un Deerns, de Froonslüüd un Mannslüüd so in de Bargen von Zermatt dolsuust!
   Ik heff mol bi Sigmund Freud leest, dat "Material", dat in'n Droom "verarbeitet" ward, is u.a. "Tageserlebnisse", "aktuelle Wünsche" un "Kindheitserinnerungen". Na, dat Letzt kann't bi mi nich sien; wi sünd as Jungs in't Woter jumpt, wi wullen planschen un swümmen: In't "Stadi", Krupunder See, Kaifu, - in de Oostsee un Noordsee. Wi Eimsbüttler Buttjes hebbt doch domools nich an Skifohren dacht!
   Wi hier sünd wieder in't Woter hüppt, nu denn ok villicht mol in't Steinhuder Meer, in'n Titisee, in de Jammerbucht oder in'n Wolfgang-See.
   Un denn op'nmol, Johren loter, mag dien junge Froo so geern Winterferien: Dol no'n Süden, Swiez oder Österriek, rop op'e Skier! Un de Jung sall dat ok lehren, mookt mit.
   Un ik stoh oftins enerwegens an de Piste un kiek op dat Leben un Drieben un mook grote Ogen: Wat is dat for'n scheunen Sport! - Ik wünsch mi, dat ik den Droom noch öfters dreum: Ik suus de Piste dol, "Schußfahrt", weetst woll, un Swung-Swung...

zurück

zurück zur hp