LÜTT BETEN PLATT MIT'T ABENDBLATT

Vadder kann allens

Von GÜNTER HARTE

Wat dat hüüt sowat veel gifft, weet ik nich; man Nober Boldt sien lütte Dirk, 1980 op de Welt komen, wat weer de ümmer stolt op sienen Vadder! - Dat de von freuh op an mit em speelt un doon un dalbert hett, scheun! Man he hett den Buttje ok veel wiest un sik helpen loten bi Arbeiten in Huus un Hoff hier an'n Stadtrand, mit Verkloren un Topacken, mit Warktüüg un mit Knööv. Dirk beleev sienen Vadder as en fründlich un stark Mannsminsch. Gegen den, dach he so, kummt keeneen an...
   As Dirk greuter weer, droff he ok sülm düt un dat alleen heelmoken, anmolen, putzen, blots dat Vadder em wat wiesen oder op wat henwiesen dä. Domools sä Dirk to anner Jungs, ok mol to mi: "Wi mookt allens sülm wedder heel!" Un ok: "Vadder kann allens!"
   So harr Dirk dat vele Johren, mit "Vadder..." oder "Mein Vater", ok in de School. De Lehrer/Lehrersche ward jo licht en ganz wichtige Persoon, un de Ollern mööt licht mol trüchsteken, wenn de Jung/de Deern nu seggt: "Aber Herr Hansen hat gesagt...!" Oder: "Bi Froo Thormann mookt wi dat ober so...!"
   Dirk much sien eerste Schoolmeistersche geern, kunn loter ok mit den strengen, ober gerechten Lehrer Beck goot trechtkomen. Man wenn wat düütlich gegen Vadder sien Oort weer, denn gung he dor ok düütlich gegenan. So hett he em mol fix verdeffendeert, gegen Lehrer un Klass', dat Vadder em nie Taschengeld geben harr..
   Jo, so is dat west mit Dirk und sienen Vadder, vor 18, 15, 10, 5 Johr. Un nu, magst di högen, nu is Nober Boldt, de Vadder, stolt op sienen Söhn: Dat de soveel lehrt, mookt un mitmookt hett, dat he de Mittelschool goot afsloten hett, un dat de nu as Dischergesell mit Lust un Könen sien Geld verdeent un öberhaupt...

zurück

zurück zur hp