LÜTT BETEN PLATT MIT'T ABENDBLATT

Wat drinkst du denn?

Von GÜNTER HARTE

Wenn wi de Wetenschoplers (Wissenschaftler) nich harrn, Jungedi, weer dat schood! De mookt uns kleuker as negen Dumme, de kriegt dorch "Tests" un "Studien" en barg rut (ok so' ´n Soken, de uns Oma al wusst hett).
   Wen du von de Wetenschoplers wat leest hest, weetst du würklich veel mehr as vorher. Öber Glück un Tofall mientwegen, - oder dat'n an de Oort, as een en Bontje itt, den sienen Charakter an rutkennen kann, - oder dat düütsche Slogers bi't Autofohren mehr aflenkt as ingelsche, - un - un - un . . .
   Ik bün nu grood dorch so'n Bericht wedder en Stück lebenskleuker worrn! Dor hett en "Wirtschaftspsychologe" wat öber dat Drinken von de Lüüd rutkregen, d. h. de Oort un Wies von'n Minsch hangt dormit tosomen, w a t de drinkt, oder annersrüm: an dat, wat een drinkt, kannst du sienen Charakter an rutkennen!
   Un dat is doch wichtig. Wenn to'n Bispill en Froo en Mann socht, oder du kickst no'n Fründ oder en Sportkumpel ut, oder een will mit sien tosomenspoort Geld bi enen mit instiegen. Kiek vorher to, wat de drinkt, segg ik di!
   Uns Wirtschops-Püscholoog hett to'n Bispill rutkregen: Beerdrinker sünd licht Beterweter, se sünd bequeem un denkt op't leevst an sik; bi't letzt steiht dor noch: ". . . auch im Bett." Wat dat heten sall, weet ik nich, ober liekers: Wohr di! Mit so enen - ik denk nu mol an'n Sport - wullt du doch nich geern in't Mittelfeld stohn, ok nich geern Duppelkopp spelen.
   Uns Peter Brammer to'n Bispill, de no't Speel ümmer blots Beer drinkt, de lett den anners bin'n Duppel ümmer lopen, un op'n Danzfest quarkt de öber de Musik, danzt nich un drinkt Beer . . .
   Dat geiht mit Friedemann allens veel beter, de blots Cola drinkt un nett un munter is. Den kannst du keen Beer opsnacken; nu weet ik endlich, worüm. Ober Cola-Drinkers süllt nich troo sien!
   Düchtige Lüüd sünd de Woter-Drinkers, de köönt alleen sien, sünd nich licht ümtobegen, seggt de Püscholoog Gebert; un en richtigen Koffidrinker is ohn Rast un Roh un troot annere nich öber'n Weg!
   Drinkst du ok geern Rootwien? Ik jo. Den kann'n in Roh geneten, snackt ruhig un verstännig, feuhlt sik anhoben; von't twete oder drütte Glas lett'n sik no Frankriek, Sponien oder Itolien dregen, villicht ok gor no Südofriko oder Austrolien.
   Weetst du, wat de Gebert rutfunnen hett: "Rotweintrinker sind souveräne Genießer!" Sühst woll, Schütt! So kann'n dat seggen, oder ok so as Wilhelm Busch: "Rotwein ist für alte Knaben - eine von den besten Gaben!'

zurück

zurück zur hp