LÜTT BETEN PLATT MIT'T ABENDBLATT

"Sorry, we are closed!"

Von GÜNTER HARTE

Vor en poor Weken weer so'n Theoterdunner vonwegen de düütsche Sprook, dat se mit ümmer mehr ingelsche Wöör ("Anglizismen") dorchsett ward. Düütsch sull doch Düütsch blieben! Worüm heet dat nu mit 'nmol "Kids" un "Steps" un "Shop" un "Looser" un "rices" un "Summerfeelings"?Wüllt de Düütschen wiesen, dat se wat köönt? Wüllt se sik wichtig doon mit Brockens ut de Weltsprook Ingelsch?
   Is jo goot, wenn een wat lehrt hett un en frömde Sprook goot kann (ok villicht Franzeusch oder Sponisch oder Russisch); man dorüm mutt jo sien Düütsch nich slechter warrn. Un mit "Multikulti", wo sik welk achter versteken doot, hett so'n verrunjeneerte Sprook nix to doon.
   Dat hebbt vor en poor Weken welk Lüüd düütlich mookt, Sprookgelehrte, Schriberslüüd, Journalisten, un dor is fix snackt un streden worrn. Un nu, so'n twee Moond wieder, is düt "Thema" an de Siet leggt, afleggt, een heurt dor nix mehr von.
   In'n Dezember 1997 heff ik hier en Kolumne "We are open!" hatt; dor heff ik mi domools al wünscht, dat uns Plattdüütsch man blots nich mit ingelsche Wöör so "kaputtmookt ward als dat Hochdüütsche."
   Ik heff dunn Bispillen opfeuhrt, sünnerlich ut de Werbung, as "New Steps" un "Button down", dat "Made for you" un "Celebrate your life!" un dat von düt dulle Rüükwoter vonwegen de "freshness of the new generation".
   Un ik heff vertellt, as ik in Eimsbüttel domools in de Gärtnerstroot in so'n bestimmt "shop" wat käupen wull, do stunn dor an de Döör "Sorry, we are closed!" So'n Schiet, de Loden weer to. Man as ik op'n Trüchweg von'n Kaifu wedder no den Loden keek, do stunn dor: "We are open!", ik harr Sott . . .
   For mi is dat "Thema Anglizismen" for't Plattdüütsche nich afhookt; ik wünsch mi wieder, dat uns Sprook nich so verhunzt un verbruddelt ward, un ik kiek un heur wieder, wat in de hoochdüütsche "Ümgangssprook" nee so seggt ward. De "Schuh-Shop" is mi opfullen un de "Leder-Shop", mien Fründ hett mi von de kloken "Stamm-User" in't Internet vertellt, en groot Koophuus in Hamborg bütt nu "Outdoor-Jacken" an . . .
   Sünnerlich un appeldwatsch ober is, wat dat nu ob de Horborger Siet geben deit: en "Immobilien-Shop"! Goh dor man mol vorbi un nimm di mol eben en Villa mit . . !

zurück

zurück zur hp