LÜTT BETEN PLATT MIT'T ABENDBLATT

En sportlichen Nomeddag

Von GÜNTER HARTE

Jo, dat Speel von HSV gegen Bayern München weer eerst acht Doog her un noch in alle Köpp. In de von de Ollern von de F-Jugend, de meist 9-jöhrigen Jungs, sowieso, de bi dat wichtige Punktspeel an'n Speelfeldrand stohn oder seten. Un sik nich blots as de Fans von Bayern oder HSV oder Schalke oder Rostock harrn, wenn jemehr Dörpsklub no vöörn störmen dä; se repen ok so it'n Speel rin, as weern se tominnst Co-Trainers: "Goh fix achterran, Kalle!" - "Torwart, nach rechts außen schießen!" - "Einwurf nach vorn, nach vorn!"
   De beiden Trainers stunnen mit twee/dree Ersatzspelers an de Siet un repen ehr Buttjes natürlich ok wat to; dat weer oftins ok bannig neudig, denn meisttiets lepen von de tosomen 14 Spelers acht bet teihn op enen Klumpen üm den Ball rüm. Uns Jungs hier mit "Heimvorteil", de sik wacker gegen de von'n heugeren Tabellenplatz strieden dän, kunnen noch nich so goot in Stellung lopen.
   "Ja, Werner, halt den Fuß hin, kämpfen!" "Hans, achter den Stürmer stellen!" Ümmerlos repen welk von de opwussen Lüüd von beide Vereens ehr Rootslääg rin, Mannslüüd un Froonslüüd. Un se grienen all, as de anner Torwart eenen hatt schoten Ball goot hollen harr un een Vadder luut reep: "Habt ihr denn da den Kahn im Kahn?!" Jo, dor weer düchtig wat los, un de Sünn schien, un de Platzvereen harr en Pott Koffi un Tassen henstellt. Jo, allens luut un lustig un in Botter, solang dat 0:0 stuun. Ok den Schiri worr mol wat toropen: "Kein Foul, Pfeiffer! Unebener Boden!" - "Schiri, kennen Sie 'ne Schwalbe?!"
   0:0 noch no twintig Minuten. Nu repen de Ollern mit'n "Heimvorteil", de so stolt op ehr Jungs weern: "Halbzeit!" - "Pause!" - "Abpfeifen!" Ober de Schiri geev noch en Eckball for de annern, de Verteidigers stunnen verkehrt, de Ball worr rinköppt: Tor! 1:0 for de annern.
   "Schummel, Schiri, dor weer keen Nospeeltiet! Dat is jo as bi'n HSV letzten Sünnobend!" - "Och, heißen Sie etwa Dr. Merck?!" Un so worr de HSV-Bayern-Dag bi de Groten nochmol lebennig, as de Buttjes no ehr Selterbuddels lepen un de Trainers jem nee instellen.
   Se strengen sik in de twete Halftiet wedder düchtig an. Un beid Mannschaften scheuten denn ok en Tor. Dat weer oftins al richtig Football, wat de dor nu spelen dän! Natürlich worr ok noch wat op't Feld, no den Schiri, no den annern 0llern ropen; man dat Speel leep fein to Enn, 2:1 for de Beteren. Trainers un Ollern loovten ehr Jungs: "Gut gespielt!" - En sportlichen Nomeddag. . .

zurück

zurück zur hp