LÜTT BETEN PLATT MIT'T ABENDBLATT

Verdeent de toveel?

Von GÜNTER HARTE

Niedsch un afgünstig is uns Sportfründ Peter nich, wi kennt em goot; he is as Architekt "goot bi kass'". Man güstern keem he hiermit rut: "Wat de hüüt verdeent, de Footballers, dat is nich mehr normool: Ward in een Johr Multimillionär." - "Nich all, Peter", meen Torsten do, "ober recht hest du: Wi leevt in'n verrückte Monetenwelt. Man ik denk mennigmol: Düsse Profis sünd jo ok en Oort ,Ware`, nich, leevt in ehr aktive Tiet so'n beten as moderne Sloven (Sklaven)."
   "Wat sall dat denn heten, Torsten, as Sloven? De foftig - bet tweehunnertfoftigdusend Mark in'n Moond (Monat) verdeent un villicht noch en düren Wogen von'n Vereen betohlt kriegt: Sloven??"
   "Ik sä jo ,in'n moderne Form`, Peter. De swatten Sloven vor 200-250 Johr hebbt ok to eten kregen un en Dack öber'n Kopp hatt."
   "Och wat, Torsten! Dat Beuse an de Sloveree is doch de Unfreeheit west."
   Uns Torsten denkt jo geern so'n beten üm de Eck, un de anter nu: "Och jo, de Profi-Footballer is also free? Hm, he mookt Urlaub, wenn he will."
   "Dat geiht doch nich in de Speel-Saison!"
   "He fohrt Ski in de Wiehnachtstiet." - "Dat droff he nich, brickt sik anners villicht en Been!"
   "Gütt sik an'n Freedag-Obend mol düchtig enen op de Lamp!" - "Dat is doch wegen de Spele an'n Sünnobend streng verboden, un öberhaupt. Denk an Mario Basler, wat de dor for'n Arger mit hatt hett!"
   "De Profi nimmt sien Fründin mit in't langwielige Trainingsloger un . . . "
   "Nix dor, Torsten, Froons dormank! Dat gifft Snack un Striet. Un de mööt doch ok in Form blieben!"
   "Na, oder de Profi lett dat bi't Speel an'n Sünnobend mol en beten suutjer angohn."
   "Ik lach mi een, Torsten. Denn hett de nich blots Trainer un Mannschaft op'n Hals, ok de Fans un de Presse; denk mol an Bayern un Leverkusen!"
   "De Presse, jo! De bloost den Ballon ümmer op. Ober von'n Lehrer oder en Koopmann oder en Architekt oder ene von't Feernsehn, wenn de mol nich vull rangoht, dor schrieft se nix."
   "Öberlegg mol: De Football-Vereens kriegt doch dat vele Geld von de normolen Tokiekers un von de Werbung un von't Feernsehn. De Spelers mööt ran, de Vereen will boben in de Tabell mitmischen. Wenn dor so'n Profi nix bringt, du, de ward op'e Bank sett, utlehnt oder verkofft." - "Also doch en Oort ,Ware`, Peter, dat geiht doch üm Sloveree un Minschenhannel!"
   "Och Quark! Slovenhannel is 1807 verboden worrn!"

zurück

zurück zur hp