Lütt beten Platt mit ‘t Abendblatt

Doch nich vor Klock teihn!

Von Günter Harte

Letzten Sünnobend wull ik mol so richtig utslopen, weer alleen to Huus. Nich, dat ik Freedag to dull arbeit‘ t harr, nee; wi harrn Skoot speelt bi Dirk in Alt‘no, un ik weer eerst nachts gegen Klock een to Puuch komen.
    "Rrrrring - rrrring!", geiht dat olle Telefon üm halbig negen, hoolt mi ut‘ n deepsten Sloop! So‘ n Schiet! Sall ik dat eenfach wieder pingeln loten?
    Ober dat dösige "Rrrrring . . .!" mag ik nich mehr heuren; ik stoh op, hopps no den Heurer hen, ran an‘t Ohr: "Hallo Günner! Büst goot no Huus komen? Keen Stau in de Stresemannstroot?", froogt Dirk fründlich. Wat saßt nu seggen?
    "Jo, goot, allens in Botter, Dirk. Blots nu hett mi een to freuh weckt! Ik roop noher trüch."
    "Geiht nich, Günner; wi fohrt glieks no mienen Broder in Cuxhoben. Dorüm bün ik so freuh op." Dimmi ok, he harr doch von Cuxhoben ut anropen kunnt, so wat! Halbig negen . . . - Na, ik will noch nich opblieben, will mi geern noch en Stünn von binnen bekieken, kruup wedder in de Koje. Ik bün grood eben afsackt, do "rrrrring - rrrring!" Wedder gellt mi dat in de Ohren. To‘n Glück heff ik nu den Heurer mit an‘t Bett nohmen, mutt nich opstohn. Ik mell mi: "Harte!"
    "Guten Morgen, Onkel Günter! Was wünscht du dir zu Weihnachten?" Mien lebe Noberssöhn üm Veddel vor negen. "Hallo, Jan", segg ik, "schon wach?"
    "Ja, seit sieben Uhr. Aber Mama und Papa schlafen noch. Ich hab schon den letzten "Donald Duck" gelesen. - Was wünscht du dir?"
    Wi fiert mit Nobers ümmer den tweten Wiehnachtsdag tosomen. Na, ik wünsch mi, as ümmer, wat he sülms moolt oder bastelt hett. Wi snackt denn noch en beten, un to‘ n Sluss segg ik to em, he sull sünnobends beter nich vor teihn anropen, narms. Dunn seggt he: "Mama hat mal gesagt: sonntags nicht vor der Kirchenzeit. Aber nichts von sonnabends, nö!"
    Ik bün nu teemlich wook. Ligg jo ober noch in de Puuch. Op‘ n Rüch. Inslopen ward nu, so twintig no negen, wiß nix mehr, ober en beten Roh hebben un sik besinnen - "Rrrrring - rrrrring!" Nu ward de Katt en Hex!
    Ik drück op den Knoop an‘ n Heurer un meldt mi. Do geiht dat von‘t anner Enn in so‘ n vornehme Snack-Oort: "Hellmann vom Weingut Mönchskutte! Sie haben vor zwei Jahren schon einmal Interesse für unsere Weine bekundet. Wie stehen Sie zu einer neuen Weinprobe mit unserem aktuellen Angebot, Herr Harte?"
    Wat meenst du, wat ik seggt heff? Root mol!

zurück

zurück zur hp