Lütt beten Platt mit 't Abendblatt 

Scheunes Hamborg!

En feinen Leserbreef mit en scheun Gedicht heff ik köttens kregen. Dor schrifft mi Froo Hannelore Gr., se harr von ehren Vadder noch en plattdüütsch Gedicht in'n Kopp, dat harr de in de foftiger Johren de Fomilie en poormol opseggt. Wokeen dat schreben harr, dat wüß se nich; ober se wull mi dat wiedergeben, dat Gedicht sull nich verloren gohn.

Hier de Versen in Froo Gr. ehr Schriefwies:
    Flüssig Gold speelt op dat Woter / lüttje Muscheln speult an Strand. / Scheep gaht rut - den Weg no See to, / Kinner speelt in weken Sand. / Jungs hebbt sick de Büx opkrempelt, staht bit an de Knee in Bach - Sünndagnohmiddag an Elvstrand, alles freut sick, alles lacht. / Anner Siet de Elv is stiller. / All de scheunen Scheep se truert, / muchen too gern ünner Damp sien, / un nu liggt se da un luert. / Hamborg mit sien Elv un Alster, / mit sien Scheep un all sien Greun / Voderstadt, wie ick di leev hebb... / Mütz af! Hamborg, du büst scheun!


    Jo, dat mag ik ok lieden! - Froo Gr. froogt in ehren Breef, wat ik wat von den "historischen Hintergrund" wüß; ik heff ehr anropen, un wi sünd dor tosomen op komen, dat dat woll no'n (1.) Weltkrieg henheurt, as dat mit de Wirtschaft noch nich so klappen dä. Wokeen dat dicht't hett? Mi hebbt de Versen an en Gedicht von Walter Gättke denken loten, en Hamborger Musiker un Schriebersmann, de Chorwarken, Vertellen un Gedichten rutbrocht hett, ok en Kritiker for Bläder un Funk weer. Wi hebbt uns in mien jungen Johren öfters dropen, un he hett mi mol sien Gedicht "An de Elw bi Blanknes" schenkt:

An de Elw bi Blanknes,
Dor blänkert de Sünn.
Dor wannert de Wulken,
Fleegt Mewen un Swulken,
Un de Wind weiht so free
Bi Blanknes her vun See.
An de Elw bi Blanknes,
Wo still is de Nacht!
Lantüchten, de gröten,
Wenn Scheep sik bemöten,
Vun den Süllbarg so sacht
Bi Blanknes in de Nacht.
An de Elw bi Blanknes
Is Anfang un Enn.
De Strom, de geiht liesen,
Sien Wegg will uns wiesen
Na Storm un Gebruus:
In Blanknes büst tohuus!
Walter, scheun! Ik denk an di.

zurück

zurück zur hp